Ua 12 nei tausaga talu ona faatino se fesoasoani mai le Malo o Saina i lo tatou atunuu o le fesoasoani lea e faailoa auala ma faiga e atiina a’e ai faatoaga ma lafumanu, ina ia maualuga le tulaga lelei o le fua mai ma faaaoga, ae sili ona tāua o le manaomia e tagata e faatauina.

O se vaega tele o fanua o le Malo o loo i nuu tu lata i le nofoaga o suesuega tau faatoaga a le matagaluega o faatoaga ma faigafaiva, o loo faatino ai lea fesoasoani ua toto ai ni eka o fanua i laau tau faatoaga faapea togalaau‘aina ma laau taumafa mata.

Ua faafailele ai foi le ituaiga o moa e na o le fuamoa e maua mai ai mo taumafa, ma moa e faaaoga foi i mea taumafa.

O le polokalame foi lea ua faatino ai se tasi o vaega o le fausia o falelaau poo green houses e toto ai fualaau‘aina eseese i se faiga e sili atu ona lelei ma vave ona fua mai.

O le vaega lima poo le phase five o lea fesoasoani ua tauaao atu nei e le sui o le Malo o Saina i Samoa ma le faauluuluga o lea fesoasoani o se alii Saina, i le Malo o Samoa latou te faatinoa e ala atu i le matagaluega o faatoaga ma faiga faiva.

O le faafetaia e le Malo o Samoa o lea fesoasoani a le Malo o Saina ua faailoa ai foi e le Minisita le susuga Laauli Leuatea Polataivao Fosi Schmidt, le tapena e lona itumalo o se faaaloalo e faapine ai lea agalelei, e ala i le faaeeina o se suafa matai mo le Amepasa o lea Malo i Samoa.

Ua faailoa e Laauli i le mae’a o lea sauniga o le a faaee le suafa Tupaialofa i le alii amepasa, ae o le taimi e faatino ai o le a tuu avanoa ai i le amepasa i se taimi e talafeagai ma avanoa ai.