O Sophia Auro Leota o se tina mai le afioaga o Salesatele Falealili ma Falefa, ma o ia foi lea ua avea o se uluai Samoa ua tauaveina le mataupu ua ta’ua o le Audiology i le Iunivesite o Kuiniselani i Perisipeni i Ausetalia.  

I se faatalatalanoaga a le Radio Samoa ma le tamaitai ia Sophia na ia ta’ua ai o le faatalauula atu o le Polokalame o le Australia Awards na ia manatu ai e o le a apalai mo lea avanoa. 

O le Audiology o se mataupu e aotauina ai le tomai o le fuaina (test) o le faalogo o tagata lautele e amata mai lava i le pepe seia oo lava i tagata matutua.  

Na ta’ua e Sophia e ui ina misia lona aiga ma lana galuega, o le faiaoga ma o se pule lagolago i le Aoga Tulagalua i Vaimea, sa ia manatu lava i le tāua o le avanoa ua maua mai le Australia Awards. 

Sa tagai foi le tamaitai ia Sophia i le telē o le fesoasoani o le a ia maua e faasoa atu mo Samoa aemaise fanau o loo iai aafiaga o le faalogo. 

Na faasoa Sophia sa ia tilotilo i le tele o faafitauli e tulai mai i totonu o potu aoga i le taumafai o faiaoga e aoao fanauiti ae e lē o lagona e le tamaitiiti – ona faapea lea o le faiaoga e faaletonu le mafaufau o le tamaitiiti pe valea ae peitai o loo iai aafiaga o le latou faalogo.  

Faamauina e lea sui o Samoa e lē gata o le a telē le silafia i auala e fesoaoani atu ai i tagata Samoa i le aoaoina o lea tomai ae o le a faapena ona siitia le malamalama i auala ma fesoasoani e tuuina atu mo ē o loo feagai ma le faafitauli o le faalogo.  

E 2 tausaga e faatino ai le polokalame a Sophia i le Iunivesite o Kuiniselani i Perisipeni i Ausetalia ma o le faamalosi a Sophia mo tagata Samoa ina ia iai le fiafiaga ma le loto e avea ma avefu’a a Samoa i lea tomai o le Audiology.  

O lea ua toe tatalaina avanoa e apalai ai i latou o loo naunau e aotauina i lea mataupu. 

Na momoli foi le faafetai a lenei tamaitai i le malo o Ausetalia mo le avanoa, na faapena foi ona ia faafetaia lona aiga ma uo mo le lagolago, a o ia alo atu ai mo lea taumafaiga.  

Ua faamauina o le a avea le tamaitai o Sophia Auro Leota ma uluai Samoa taualoa e agavaa e faatino lenei tomai i Samoa i le mae’a ai o ana taumafaiga i le tausaga fou.  

O Sophia na faauuina mai foi i lona faailoga tikerī i le Faatufugaga (Bachelor of Arts majoring in Early Childhood Education).