Search
MP Fuaava Suluimalo Amataga Penaia
Photo Credit: Parliament of Samoa

Telē le faafitauli i aoaoga a le Itumalo Aleipata

Na tolaulau e le sui faipule o Aleipata Itupa i Luga, afioga Fuaava Suluimalo Amataga, i lana lauga i totonu o le Palemene i le aso ananafi, nisi o faafitauli o loo toatuga ai le faatinoga o a’oa’oga i totonu o lona itumalo.

Saunoa le faipule, e tolu aoga tulagalua o loo i totonu o lona itumalo, o le aoga tulagalua a Lalomanu, o le aoga tulagalua a Vailoa, ma le aoga tulagalua a Ulutogia.

O le faafitauli tele o loo tulai mai i nei aoga tulagalua, o le lē lava o faiaoga e a’oa’oina tamaiti i totonu o potu aoga.

Na ia ta’ua sa fai la latou fonotaga ma le afioga i le minisita o Aoga ma le faauluuluga o le matagaluega, ma na ta’ua ai ua iai le aoga tulagalua a Ulutogia i le tulaga ua lē ausia e le aoga le aofaiga o tamaiti e tatau ai ona faaauau pea lea aoga tulagalua.

Mo lola a aoga tulagalua e tolu o loo i totonu o le itumalo, o le aoga tulagalua a Lalomanu pe ā ma le 150 tamaiti, o le aoga tulagalua a Vailoa e i lalo ifo i le 100 tamaiti, ma Ulutogia e i lalo ane o le 50 tamaiti.

O nisi aoga e silia ma le 100 tamaiti ae na o le taitoalua faiaoga i le aoga atoa; o se popolega lea ona e mautinoa e lē faigofie le galuega a nei faiaoga e toalua e a’oa’oina ai mataupu uma i tamaiti.

Ua lipotia mai foi e iai nisi aoga ua faaaogā tamaiti o vasega matutua e o ane e a’oa’o tamaiti i vasega laiti.

Na ia ta’ua foi e tele tamafanau a lona itumalo ua iu manuia mai ni iunivesite ma isi a’oa’oga maualuluga, ae o le toatele lava o latou e saili i galuega faafaiaoga i aoga i Apia, ona nonofo ai lea i nofoaga tutaulaga ma faaaooga ai ma latou fanau i Apia, ae ua le maua ai e aoga a si ona itumalo na faamanuiaga mai tomai o ana tamafanau.

Na ta’ua e le sui faipule, o le itu lea ua maitauina atonu o se tasi o mafuaaga tele i le faafitauli o le lē lava o faiaoga, ona o le taumamao i tuā o aoga a lona itumalo, ma e lē faigofie ai mo se faiaoga e nofo i se nuu e mamao ese mai ona tausavali mamao atu i Aleipata.

E lē gata i le mamao, ae tele foi tupe e faaalu i pasese e totogi i auala o feoa’iga poo le totogi foi o le penisini e utu ai le taavale a se faiaoga e tausavali mamao atu.

O le tatalo a le faipule o Aleipata Itupa i Luga i le afioga i le Minisita ma le faigamalo, ina ia iai se taumafaiga e fesoasoani atu ai i le faafitauli o le lē lava o faiaoga e a’oa’oina tamaiti; e le gata o faiaoga ae ia lava ni resources e faatino ai galuega a fanau aoga.

Sa ia ta’ua nisi fesoasoani, pe mafai ona faatulaga nisi o fanau a le itumalo ua iu manuia mai a’oa’oga ae atonu o loo avanoa e lē o faigaluega, ae pe ono maua ai ni o latou taimi e fesoasoani ai i aoaoga a le fanau i potu aoga (teacher aide), ae maua ni o latou alauni.

Peitai o le lauga a le faipule o Vaisigano Muamua, afioga Niuava Eti Malolo i le asō, na ia saunoa ai, e lē auai o ia i le manatu faapea ua lē lava faiaoga.

E talitonu Niuava, o loo toatele faiaoga, ae ua tele ina oese mai le auaunaga faafaiaoga ae agai i isi galuega ma matagaluega o loo mananaia mai ai totogi (attractive package), lona uiga o loo faaletonu le tulaga o totogi o faiaoga.

O le fautuaga na faaoo atu e Niuava i le Minisita o Aoga pe lē fai ni attractive packages i totogi o faiaoga, atonu e tau taofiofi mai ai i le galuega.

O loo faaauau le fonotaga a le Palemene i lenei aso.

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required