O le tele o Iunivesite i le atunuu ua lipotia i le asō e le RNZ e lei iai i se tulaga lelei i le itu tau tupe i le tausaga faaletupe na se’i mavae atu nei 2022.
O lipoti faaletausaga a Iunivesite ua iloa ai o le AUT, Massey, Victoria, Canterbury ma Otago sa faamauina uma le lusi o tupe i le tausaga talu ai se’i vagana le Iunivesite o Aukilani ma Lincoln.
Fai mai se tasi e tele lona tomai i mataupu faapea o le analyst o Roger Smyth e le masani ona vaaia le tulaga lea i le tele o iunivesite ua lusi tupe i se tausaga se tasi.
Na ia ta’ua foi o le pa’ū i le numera o tamaiti aoga faavaomalo aemaise foi i tamaiti aoga i Niu Sila lava ia lea e mafua ai lea tulaga.
Faailoa e le Ofisa Sili o le Universities NZ, Chris Whelan e le o se tala lelei lenei tala ma e le mafai foi ona faalagolago tasi iunivesite i tamaiti aoga mai fafo ma e manaomia se fesoasoani a le malo.
Fai mai a ia o le malo latou te faatonutonuina le tusa ma le 80 pasene o tupe maua i iunivesite ma ua tatau ona fesoasoani ane i iunivesite i taimi faapea o le tetele o luitau ua feagai ma latou auā ua mae’a faailo e isi iunivesite e pei o Otago, Victoria ma Massey o le a iai mea o le a aveesea mai auaunaga masani ia faaitiitia ai le tupe faaalu i le taimi nei a o feagai ai ma ia luitau.
