E ui o loo māua le iai o ni tagata na fano soifua i le faai’uga o le la vaiaso i luga o auala tetele, ae o le tala fiafia na iai nisi sa mafai ona faasaoina o latou ola a o iai i faigā malologa o le Labour Day long weekend.
I lipoti mai le Ofisa o Leoleo mai le Counties Manukau, na faailo ai nisi o galuega o le auaunaga sa faatautaia e pei ona galulue ai sui e ala i le faaaogāina o le vaalele helikopa – le Police Eagle e lavea’i mai nisi o tagata sa tau sa’ilia i le vasa.
O le afiafi o le Aso Toona’i na māua ai le logoina atu o le auaunaga mo se fesoasoani i se vaa ua sa’e ma goto ifo i tai ane o le Kawakawa Bay.
Faamauina i faamatalaga e to’alua ni alii na aga’i i lea vaa, ma e ta’ua sa fai o la ofu faaola poo lifejackets ma na mafai ona la ‘aau aga’i i le matāfaga lata ane mai le itu sa goto ai le vaa.
Ta’ua e le Police Eagle, o le tala fiafia sa mafai ona maua ia alii i le itu na ‘aau ane iai i la’ua ma lavea’i mai ai.
E le’i iai se tasi na faamanu’alia ma o loo saogalemū uma i la’ua.
E mae’a lea galuega ae māua poo le toe 20 minute i le itula e 7 i le afiafi, ae lipotia atu le tau sa’ilia ai o se tagata māulu(diver) na leiloa mai i le Manukau Harbour.
Sa faatino sa’iliga a le Eagle i tai ane o matāfaga i le penisula o Awhitu.
Na faasolo itu uma o le penisula a latou sa’iliga ona o tulaga malolosi o ave o le sami.
E tusa ai ma lipoti, na segaia le pailate i se mōlī o loo faasusulu atu ia i latou mai le sami, o lea na iloa atu loa e le latou vaega lavea’i le tagata o loo taumafai i se auala ae o se metotia e iloa atu ai o ia.
O lea na aga’i ane loa le vaa lavea’i a le Coastguard e aumai i le pa’u mātū lea tagata māulu.
Faamauina e itulā atoa o faia lea galuega tau sa’ili.
E le’i aafia pe na faamanu’alia foi o ia i le taimi na iai i totonu o le sami.
Na patipatia e le Satini Sinia, Garry Larsen, le galuega fitā na feagai ma le vaega o le Eagle crew i le vave ona tali atu i valaau aemaise o le fesoasoani atu i nisi o sui o faalavelave tutupu faafuase’i, aemaise le vave maua ma lavea’i ia tagata a o le’i pogisa le aso; talu ai e fai sina faigatā ona faatino o le galuega pe ana faapea e alia’e ia faafitauli i le po.
Ua fautuaina e leoleo tagata o loo fuafua e aga’i i le sami, ina ia māta’itūina lelei vaega uma o le vaa, ia mautinoa o loo lelei vaega uma, o loo saogalemū mo le aga’i ai i le sami.
Ia siaki poo lelei auala o fesoota’iga, ma ia mautinoa o loo fai ma taga’i i faamaumauga mai le vaaitau mo tulaga o le tau.
Ia iai uma meafaigaluega ma vaega e fesoasoani ai i taimi e tula’i mai ai se faalavelave, ma ia faailoa i nisi o aiga ma uo fuafuaga o le aga’i ai i ni fagotaga i le tai.
Puna o Faamatalaga: https://www.facebook.com/share/p/1BF17UPeu8/
