I le 14 tausaga o faatali le aiga o Faumuina Tutuila poo afea e suesue ai talosaga apili sa toe lu’i ai faaiuga a le Faamasinoga o Fanua ma Suafa ua silia i le selau tausaga, o le Aso Faraile na tea nei na folasia ai le faaiuga a le faamasinoga apili maualuga a le Faamasinoga o Fanua ma Suafa i talosaga e 11 sa toe finauina ai faaiuga ua taoto.
O le faaiuga ua taoto ai nei ua teena uma ia talosaga apili ma faatumau faaiuga ua autausagā o taooto.
Mo le silafia o Afu Faumuina Tutuila o se alo e faasino i le afioga Faumuina Tutuila na faatulai ese ma o latou eleele i se faaiuga a le nuu o Tanugamanono, ma na faatama’ia foi lo latou fale i le malaia ma aafia ai a latou meatotino aogā ma tāua.
O le tuufua ai o le fanua i le 14 tausaga a o tālia le suesueina o talosaga apili, o le faaiuga ua taunuu nei iai, ua faaalia ai e Afu Faumuina Tutuila, ua latou talia le faaaogā o se vaega o le latou fanua ua oo atu iai se tasi o fale o le ekalesia EFKS ma ua o latou talia foi tuaoi ua faataoto mai i le faaiuga a le Faamasinoga Maualuga o talosaga apili a le Faamasinoga o Fanua ma Suafa.
Ua faailoa foi e Afu ua sauni e toe foi i le nuu ma nofoia lo latou fanua e tusa ma le 3 eka lona tele, ae ua faagasolo foi tapenaga mo le toe fausia o so latou fale.
O se tasi o finauga a le aiga i le Faamasinoga Maualuga le supreme court na latou su ai alii ma faipule o le nuu ma manumalo ai, e pei ona sa poloaina e le faamasinoga alii ma faipule o Tanugamanono e totogi atu ni taui tupe i le aiga ona o a latou meatotino e aofia ai ma le fale na faaleagaina.
E sefulutasi itu na talosaga e toe iloilo faaiuga a le faamasinoga lea ua teena uma, ae fā itu na tetee.
O le afioga i le Sui Peresetene le afioga Afamasaga Michael Soonalole na seei i le suesueina o le apili, faatasi ai ma le laulau o se Peresetene lagolago ma faamasino sinia o le Faamasinoga o Fanua ma Suafa.
