O loo teena e le tamaitai sa galue ai i se faletupe i le atunuu moliaga e 32 o le gaoi a o avea ma tagata faigaluega.
O le amataga o le vaiaso nei na toe valaau ai lea mataupu faasaga i se tamaitai 35 tausaga le matua lea o loo tuuaia i lona aveesea faasolitulafono lea o tupe a se tasi o faletupe sa galue ai muamua.
O faamaumauga a le faamasinoga o loo atagia mai ai, sa tala e lea tamaitai ni tupe mai totogi o nonogatupe a ni tagata mo ia lava, e faaaogā ai teugatupe e faatino i luga o le initaneti.
Ma o lea gaoiga o loo aafia ai ma nisi o lona aiga, ae o tupe na talaina e lea tamaitai sa faaaogā mo ia lava.
O lea tamaitai na faamavae mai le faletupe sa galue ai, a o lei maua lana soligatulafono, peitai sa faatino suesuega a le faletupe ma faamautu ai gaioiga a lea tamatai lea na afua ai ona molia.
O loo tatala lea tamaitai i tua e faatali ai le aso e faia ai lona faamasinoga.
