E leai se malosiaga faaletulafono o le Peresetene o Faamasinoga o Fanua ma Suafa na te iloilo ai le talosaga a le nuu o Leauvaa lea sa finau ai e taofi pe faateletelegese le galuega a le nuu o Afega i le faataotoina o le tuaoi o o latou eleele o loo i tua mai o le 723 eka o fanua o Afega ua tuuina atu mo Leauvaa.

O le Aso Tofi na tea nei na fofogaina ai le talosaga a Leauvaa ma aumai ai le faaiuga a le Peresetene i le aso lava lea ma teena ai le talosaga, ma le tuualalo a le faamasinoga afai o loo iai se manaoga o Leauvaa e taofi lea galuega pe faateletelegese, o le tiute lea o alii ma faipule o le afioaga ia feiloai i alii ma faipule o Afega e fālē ai lo latou finagalo.

Ua faailoa e le Peresetene le afioga Lesatele Rapi Vaai, o loo talosaga Leauvaa e faapafala faaiuga o le tausaga 1952, 1961 ma le 1963 lea ua maioio ma manino ai eleele e faasino i le nuu o Afega o loo i tua atu o le 723 eka mo Leauvaa.

O nisi o ia eleele ei tua atu o le 723 eka o loo nofoia e aiga e 18 o Leauvaa ma ua faaalia e le Peresetene i lana faaiuga, o loo nonofo faasolitulafono pea ia aiga i eleele o Afega.

O le faapafalaina o faaiuga ua taoto o le galuega lea e patino i le faamasinoga o talosaga ma iloiloga e seei ai le taitaifono ma faamasino e toalua, peitai e le o iai lea faamasinoga i le taimi nei, e pei ona aiaia i le tulafono fou o Faamasinoga o Fanua ma Suafa o le tausaga 2020.

E lē iloa se taimi e faatino ai lea faamasinoga e pei ona faailoa e le Peresetene i le faaiuga.

O le teena o le talosaga a Leauvaa ua faaauau ai pea le galuega o le tuaoi o fanua o Afega, ae ua tālia e Leauvaa le latou talosaga e toe iloilo le faaiuga a le faamasinoga na faia ia Mati o le tausaga nei, lea na faamautu ai le faatinoina o le galuega o tuaoi o eleele o Afega e pei pei ona iai le faaiuga a le Faamasinoga o Fanua ma Suafa o le tausaga e 1963.

O le faamasinoga foi lea o talosaga apili o le a iloilo ai ma le talosaga a le afioaga o Levi Saleimoa o se tasi o nuu o loo finauina le aafia o o latou eleele i le galuega a le nuu o Afega.