Ua leai mai le minisita o felauaiga i le valaau e sui le tulafono ina ia mafai ai e fomai ona lesitala igoa o gasegase e lē mafai ona toe avetaavale agai i le New Zealand Transport Agency, NZTA.
O le manaoga lea o se tasi e suesueina tino o tagata maliliu a o ia suesueina le maliu o le tamā e 55 tausaga le matua mai Warkworth ona o le faalavelave tau taavale i le 2020.
O suesuega nei na sau ai ma le manatu o le iai i totonu o le NZTA i mataupu ua lē tatau ona toe tago i le ave o le taavale, e ono faaitiitia ai le ma’umau o soifua o tagata nei i le ono tulai mai o faalavelave.
O lipoti a fomai i le lē mafai ona toe avetaavale e lē o iai se malosiaga faaletulafono e taofia ai le tagata ma’i ma ua faatalosagaina ai le toe teuteu o le tulafono a le Land Transport Act 1998 e faataga ai fomai e faamalosia le lipoti agai i le NZTA i mataupu faapenei.
Ua lipoti e le Newshub o loo faamaonia ai e le NZTA o lea ua mae’a a latou iloiloga i le talosaga faatasi ai ma le matagaluega o felauaiga.
Ae mai le minisita Simeon Brown, na te faaaloalogia le talosaga ua aumai peitai e lē suia ai le tulafono.
