Ua faailoa e le alii Minisita o Aoga, Afioga Seuula Ioane le teena ai e le Matagaluega o le tusi sa tuuina atu e le Komiti o le aoga ma le alii Faipule o Sagaga 2 e faamalolo ai le Uluaoga o le Kolisi o Sagaga.
Na ta’ua e Seuula sa tuuina atu le tusi ina ua taulimaina mo le suesuega a le Matagaluega i mataupu o loo tuuaia ai le Uluaoga, peitai na toe foi mai le tusi ma le faaiuga o le suesuega e leai ni faamaoniga o tuuaiga.
Sa faailoa e Seuula o le talitonuga o le Matagaluega o mataupu lava faatatau i fanua o loo pisa ai nei lea ua mafua ai nei vevesi.
Ua ta’ua mataupu ua lagalaga ona ua iai fanau aoga a afioaga e iai Leauvaa, Levi ma Tuanai ua aveesea ma le Kolisi o Sagaga ona ua faamalosia ona taofia e le Komiti ma le alii faipule ona toe lesitala atu tamaiti o ia afioaga.
Ua maua foi le pa’ū maualalo i le aofai o le tamaiti e resitala atu i lenei tausaga mo le Kolisi o Sagaga, ona ua toatele tamaiti o afioaga nei ua lē toe aooga atu.
Sa maua foi ua iai nisi o Kolisi i le atunuu ua saili iai avanoa o fanau nei e o latou mātua ona o le faafitauli ua tulai mai.
Ina ua fesootai atu i le Faipule le Tofā Maulolo Tavita Amosa na ia ta’ua ai e leai se tulaga faapea o iai, peitai sa ia ta’ua e faapea, “Ua leva ona iai le policy a lo matou nuu poo le fā i le lima tausaga talu ai e faapea e ō latou ona ua lē lava matou faleaoga, ae na ou tulai mai loa o se taitaifono ae ou te lei faipule, ia o a’u o le faiaoga, sa ou fai i nuu e aua ae onosai pea afai o la e fiafia latou e omai ia lelei….aemaise la faiaoga o la e aumai latou fanau.”
O loo matuā teena malosi e le alii faipule se mea faapena o tupu mai.
O loo ta’ua e lua tusi na tuuina atu mo le ofisa o Aoga ma le PSC e faamalolo ai le Uluaoga, ae lei ta’ua poo ā mafuaaga, ma o ia tusi uma na teena.
Sa fesootai i le Uluaoga e lē o manao e tuuina mai sana faamatalaga ae ua faamanino e Seuula ua taoto ai faapea le mataupu lenei ae o loo manatu e tatau i le itumalo ona agai atu i le Matagaluega e soalaupule le mataupu ona o aafiaga o aoga a fanau i mataupu e lē o au iai so latou malamalamaaga.
O le sui faipule o Sagaga 2 o lē sa avea ma faiaoga i ni tausaga e tele a o lei avea ai ma sui faipule o le Itumalo, ma na ia faailoa e leai se mea faapea o tupu, masalo ua teuloto lava mataupu i finagalo o afioaga nei.
Ae sa faailoa foi lona lē fiafia ona o le faaleaga pea e ia afioaga o le igoa o Afega i mataupu faapenei, peitai e leai se tulaga faapea o tulai mai.
