O se pepa o faamatalaga na tuuina mai e le Afioga Magele Sekati Fiaui ia tatou tala o loo ta’ua ai lona teena o tuuaiga e faapea ua ia faaaogā le $150,000 o le tupe ua atofa mai le Poloketi tasi miliona tala mo totogi o le aufaigaluega ma le komiti o le fono faavae a lona itumalo.
Ua faaalia manino e Magele e leai se seleni o ia tupe na ia faaaogāina, sa ia faailoa foi o le tusi siaki ma lona faaaogāina i galuega sa faatino mo le itumalo sa iai lava lea i le failautusi o le Fono Faavae talu mai le amataga.
Ua ta’ua foi ua mae’a tuuina atu lipoti o le faaaogāina o ia tupe i le Komiti galulue i le Matagaluega o Tina ma Tamaitai o loo gafa ma le Poloketi o atinae o nuu mo a latou iloiloga masani.
Ua faailoa foi e le alii faipule ua mae’a faailoa atu e le tamaitai Minisita o le Matagaluega o gafa ma le poloketi o le a faamatuu atu seleni o totoe mo le faamae’aina o le poloketi a le itumalo pe a mae’a iloiloga a le komiti.
O loo faailoa foi i lea pepa o faamatalaga le faamaualaloga a le alii faipule e lē gata i lona itumalo ae o Samoa ma ia ta’ua ai e lē mafai ona ia faia se tulaga faapea e manumanu i lona itumalo aemaise le alofa i lona aiga.
Sa fesiligia le Tamaitai Minisita o le Matagaluega o Tina ma Tamaitai Afioga Mulipola Anarosa Ale Molioo i le mataupu, ma ia ta’ua ai o loo tālia le suesuega a le Matagaluega o Tupe i le mataupu a Faasaleleaga 2, ma o loo faatino i le faagasologa masani lava pe a fesiligia se vaega tupe i le poloketi a itumalo.
