O loo faagasolo ai nei le taamilosaga kirikiti faaperetania a alii e i lalo o le 19 tausaga poo le ICC Under 19 Cricket Men’s Cricket World Cup EAP Qualifiers lea o loo faia i Darwin Ausetalia ma o loo auai ai ma le ‘au a Samoa.
Na ta’ua e le sui o le asosi kirikiti a Samoa Perelini Mulitalo i le tulaga o le taumafaiga a le ‘au i lenei taamilosga.
“E tusa ai ma taunuuga o taaloga taitasi a le ‘au o loo maitauina ai le ao ina faaleleia le tulaga o le tā.
“E le o mafai ona uma ova faatulagaina e 50 o tatā ai le ‘au i taaloga uma ma o se tulaga e ao ina faaleleia”.
E ui ina le auai le faagatama lenei i taaloga a le Pasefika i le tausaga nei, ae o loo faatupulaia pea le fuainumera o alii o loo naunau i le kirikiti.
“O loo maitauina le faatuputupulaia pea o alii o loo faapea ona auai i le taaloga e fua i le aofaiga o ‘au o loo taaalo i lea tausaga ma lea tausaga”.
E 14 ‘au mai atunuu e aofia ai ma Samoa lea o loo auai i lenei taamilosaga ma e faamae’aina i le vaiaso nei.
