Ua lē o toe motu malaga tuusa’o mai Saina a vaalele o le Hainan Airlines e pei ona taunuu i le Aso Toonai na tea nei le isi malaga ma pasese o tagata tafafao e silia i le 200.
O le malaga lea na toe foi ai le aumalaga muamua e 250 na taunuu i le afiafi o le Aso Sa 28 o Me lea sa nonofo i nisi o faletalimalo i le taulaga, ma malaga foi e maimoa i Savaii.
O le afea o Samoa i ni malaga tuusa’o mai Asia o se avanoa sa moemiti iai le atina’e o tagata tafafao i lo tatou atunuu i le tele o tausaga ua tuanai a o lea faatoa tino mai.
O le kamupani o le Samoa Royal Tour o loo faagaioia e nisi o le itumalo o Gagaifomauga Numera 3 e pei ona faailoa e le sui faipule o le itumalo o loo iai se sootaga ma se kamupani i Hong Kong o faagaioia lea tapenaga, o loo feagai ma le faia o fesootaiga uma mo le aumaia o turisi mai Saina i le atunuu ia malaga taitasi i le vaiaso.
E valu aso e tafafao ai i Samoa ona toe foi lea o ia tulisi mai Asia.
