Ua faataatia nei i le laulau a fono a le Palemene le lipoti a le Komisi suesue o faigapalota lea sa taamilo i nuu ma afioaga o itumalo faapalota e 51 o le atunuu.
O le lipoti lea o le a iai se taimi ona faailoa lea mo le silafia e sui usufono uma ma faapena ona felafolafoa’i iai finagalo.
O se galuega o loo nofo faatali iai le atunuu poo a ni fautuaga a le komisi suesue ua folasia i le latou lipoti faasino i nisi o mataupu sa fesiligia ai ni finagalo o tagata palota, e pei o le 10 pasene o nofoa o tamaitai, ma le palota mai fafo o tagatanuu o Samoa.
Ae i taualumaga a le fono aoao i le vaiaso nei, ua pasia le lafo na faatu e le Sui Fofoga Fetalai o ia o le taitaifono o le komiti o tulafono tumau, o le a teuteu ai nisi o tulafono tumau e faatonu folau ai sui faipule e faamalolo lē tumau mai le toe auai i fonotaga e le gata o le fono aoao faitulafono, ae o komiti a le Palemene.
Le Sui Fofoga Fetalai o le taitaifono o le komiti o tulafono tumau a le maota fono le tofa Auapaau Mulipola Aloitafua.
