O le galulue faatasi o matāgaluega uma a le malo, o faalapotopotoga ma le vaega tuma’oti faapea faifaato’aga, o le aufaifaiva aemaise o paaga faaitulagi ma faavaomalo, ua faaalia e le Minisita o Faato’aga ma Faigāfaiva o le a mafai ona ausia ai le sini o fuafuaga alualu mamao a le malo ia maua pea taumafa i se tulaga e gafataulimaina.
O le Aso Tofi o lenei vaiaso na tatala ai e le Minisita le fonotaga e talanoaina ai auala eseese i se taumafaiga e māta’itū faiga taumafa i Samoa e faamalosia ai gaioiga e tali atu ai i suiga ogaoga o le tau.
Na faailoa e le Minisita e lē faigofie le tali atu i ia lu’itau ma e tāua ai le galulue faatasi, ma o laufanua, le gataifale ma le saogalemu o itumalo ta’itasi ua mātauina ua ma’ale’ale ona o aafiaga o suiga o le tau.
“O afā, mugalā, lōlōga ma le solo o le talafatai, o nisi ia o vaega ua tuta’ia ai atina’e tau faato’aga ma faigāfaiva auā le mau o taumafa mo le atunuu, aemaise o tupe maua mai i nei atina’e tāua” e pei ona saunoa ai le Minisita, le afioga Fuimaono Maiava Tito Asafo.
Faaalia e le Minisita ua mae’a ona faataatia e le malo nisi o ana fuafuaga tāua alualu mamao e aofia ai le fuafuaga mo le vaega ma’oti tau faato’aga ma faigāfaiva, o ālafua mo faiga tau taumafa.
O faiga faavae i le suiga o le tau mo faato’aga ma faigāfaiva ma isi.
Peita’i e faalagolago le manuia o ia taumafaiga i le galulue faatasi o auaunaga uma a le malo ma le atunuu lautele.
