E 200 molī e ola i le malosiaga o le la ua fesoasoani mai ai le Malo o Initia e tauala mai se tasi o faalapotopotoga ua ta’ua o le Barefoot College International.

I upega o faamatalaga mai le Faamalu o Faalapotopotoga Tma’oti i Samoa nei (S.U.N.G.O.), lenei fesoasoani e afua mai i se aoaoga na auai ai tina e toafa mai afioaga o Siuniu Falealili, Piu Falealili, Vaotupua ma Tapaua i Falealupo i Initia i le tausaga 2012.

O le aoaoga na auai ai nei tina ina ia iai le tomai ma le agavaa tau inisinia i malosiaga e maua mai le la poo solar engineers.

O le sini autu o lenei poloketi ina mafai ona faasafua nei molī i nai aiga e le o mafai ona oo atu iai le faaolaina o le moli.

Sa fuafua le container e faaoo mai ai lenei fesoasoani i le atunuu i le tausaga ua mavae ae ona o tuutuuga ma auala o puipuiga o le koviti sa lē mafai ai ona faataunuuina.

O le masina o Aperila i le tausaga nei lea ua taunuu ai lenei faamomoli ma ua faasafua atu i afioaga o nei tina sa auai i le aoaoga i Initia.

O moli nei e silia ma le $4 miliona rupees e tusa lea ma le silia i le $130,000 tālā Samoa.

I le amataga o le poloketi na agai lea i tina ma tamaitai i totonu o nuu ma afioaga aemaise aiga o loo tulaga faaletonu i le Pasefika ina ia mafai ona maua lenei fesoasoani mo i latou.

Na faafetaia e nei tina e toafā le fesoasoani o le a faaaogā ma le tatau mo aiga o loo manaomia ma e faamauina ai foi lenei meaalofa mai le Malo o Initia mo latou.

O lenei poloketi e faapupula atili ai le auaunaga faifai pea a le faamalu mo faalapotopotoga tuma’oti i le atunuu ina ia atina’e le soifua manuia o aiga mo le agai i luma.