E lei nofonofo aiga na lua o le afioga i le alii faipule faaolioli o le Vaa o Fonoti, o loo alala ma papaaao i Aukilani i se latou sauniuniga e tapena ai se latou fesoasoani auā se isi faigāpalota e ono tulai mai i le latou itumalo e ala i le latou faipule faaolioli ia Mau’u Siaosi Puepuemai.

A o lei lauina le faaiuga o le faamasinoga o nei sui faipule poo le ā se tulaga e iai le latou sa seetolu, pe toe apili le iuga pe leai, ae sa latou tapenapena pea auā i le lagona o aiga na lua e lelei lava le saunia nai lo le faafuaseia. 

O le faamoemoe la o aiga na lua o le afioga i le faipule faaolioli i Aukilani na faataunuuina ai se latou po siva i le fale faafiafia o le Tausala Night Club i Magele e valaaulia ai aiga, uo ma ē masani faapea alo ma tamafanau o le itumalo o le Vaa o Fonoti latou te fiafia faatasi ma apogi le latou faamoemoe.

Ta’ua e le afioga ia Mulitalo Niu Sila Opa Auelua o se tasi o sui o aiga na lua, e ta ane le 7 i le afiafi ua leai ni laulau o avanoa, ma e maoa’e le alofa tulai o le atunuu, ua osaosa foi faamanuiaga ua foai i lea po, e le gata i le aaomafola i ekalesia sa iai o latou sui ae faapea foi i le tali atu o aiga ma tamafanau o le itumalo.

E tele siva Samoa na faatinoina ae o nisi sa tusi sa’o a latou foai ona ua puupuu le taimi. 

Sa tuu atu foi le tau’au o le aiga lagolago o le FAST i Aukilani i lenei faamoemoe, ae sili ai le maualuga o lea afiafi ona ua fetaui le malaga mai o le fetalaiga ia Mau’u Siaosi Puepuemai ma lana aumalaga i nisi o fuafuaga o lana pisinisi i Samoa, ma tapenaga a aiga na lua o loo faia i Aukilani ma o se fiafiaga sili lea mo latou ua fetaui ai fola e pei o upu a le atunuu.

O le susuga ia Tui Eddie Taualapini sa fai ma Fofoga o le po, o le fetalaiga ia Vaivaimalemalo Iopu sa ia faafeiloaia le mamalu o le atunuu na auai atu, ae o le fetalaiga ia Fea Lagiao Satiu sa fai ma sui o aiga na lua e faaleo le agaga o le faafetai i le paia o le auvalaaulia faapea Samoa potopoto e tusa ai ma le auai atu e lagolago se faamoemoe o aiga na lua auā lo latou tofi mo le isi faiga filifiliga o loo loma nei mo le itumalo.