O le Aso Lua o lenei vaiaso ua tauaofia ai le Fono Aoao Faitulafono mo lana fonotaga faaiu o le tausaga, ma o se tauaofiaga o le a faataatia ai ma le tala faaopoopo o fuafuaga tau tupe a le malo mo le tausaga faaletupe o loo faagasolo.
O le tala faaopoopo muamua lea o le tupe e lagolago ai fuafuaga o le tala autu o le tupe o le tausaga faaletupe 2023 i le 2024.
O le tala faaopoopo muamua foi lea o le a faataatia i le laulau a fono e le sui Faipule o Vaimauga 3 ua avea nei ma minisita o tupe le afioga Lautimuia Uelese Vaai.
O nisi o lipoti a komiti faapalemene ma lipoti a matagaluega ma faalapotopotoga a le Malo o le a folasia ai foi i lea tauaofiaga faaiu o lenei tausaga ua lata ina ma’ea.
