Ua taualuga polokalame a le toese i Tanumalala, polokalame ia o le ola toe fuataina mo lenei tausaga ma faia ai se polokalame sa faailoa ai taleni siva, pese ma tala sa faatinoina e alii ma tamaitai talavou, o le au tino i matutua foi o loo tuli faasalaga i le falepuipui.
Ua faailoa e le matagaluega o leoleo, falepuipui ma le ola toe fuataina o ia polokalame ua mae’a ma taualuga i faafiafiaga eseese, o tala, pese ma siva o le sao lea o pagota i lenei tausaga o le a mae’a ma fotuai mai aso fiafia o le Kilisimasi.
Sa molimauina lea polokalame e le pulega o le matagaluega, faapea aiga ma uo o i latou o loo tuli faasalaga i le toese i Tanumalala.
O tausaga ua tuanai sa faia ai foi ia polokalame sa amata mai i le taimi o le falepuipui tuai i Tafaigata ma faaauau atu ai lava i Tanumalala.
