O le sauniga masani faalemalo i le maota o le afioga i le Ao o le Malo ma lana masiofo i Vailele, na tauaao ai tusi tofiga o le Haikomesina o le Malo Peretania Tele, o le a faamautu i Samoa mo le 3 tausaga.
O le Haikomesina le susuga Gareth Keith Hoar ua toalua ia te ia sui o lea Malo ua galulue ma faamautu i lo tatou atunuu talu ona tatala le ofisa o lea Malo i Apia i le tuanai o tausaga o faamautu i Niu Sila le sui o lea Malo sa ia vaaia foi mataupu i le va ma le Malo o Samoa.
Faaalia e le Gareth o loo laualuga i le silasila a lona Malo, sootaga vavalalata o Malo e lua i soo se itu o le atina’e, aemaise o loo tulimatai le fono a taitai o Malo o le Taupulega o le a usuia i Samoa i le tausaga fou, lea o le a afio mai ai le Faaao o Malo o le Taupulega lana Maiesetete le Tupu o Salesa III.
O le tauaao ai o tusi tofiga o le sui o le Malo Peretania, sa ia faailoa ai le agaga faafetai o lona Malo ma le aigatupu i le afio atu o le afioga i le Ao o le Malo i toe sauniga o le Tupu Tamaitai o Elisapeta II, ma le faauuga faapea le faapaleina o le Tupu o Salesa.
