Ua aloaia nei le tofiga o le sui o le Malo o Samoa mo atunuu o le Iuni o Europa ma Peretania faapea le atunuu o Peleseuma poo Belgium ina ua mae’a tauaao e le Tupu o le Malo o Peleseuma tusi faamaonia o le filifilia o le tamaitai o Francella Strickland e avea ma Amepasa o Samoa i lea atunuu.
O le tamaitai o Francella Strickland sa galue i le Matagaluega o le Va i Fafo ma Fefaatauaiga a Samoa o se tasi o ofisa lagolago ae na filifilia e le Malo e avea ma Amepasa mo atunuu o le Iuni a Europa, o Peretania ma Peleseuma, ina ua tuanai ni tausaga sa galue ai o se sui lagolago o Samoa mo ia atunuu ma sa avea ai foi ma failautusi muamua ma sui lagolago o le Malo Samoa i le ofisa o le Amepasa o lo tatou atunuu i Niu Ioka i Amerika.
Ua silia i le 20 tausaga o galue o ia i le Matagaluega o le va i fafo ma fefaatauaiga e lē gata i Samoa a o atunuu i fafo sa tofia e galue ai.
