Ua tauaao nei e le Minisita o le ofisa o le komisi o faigapalota le afioga Faualo Harry Jeffrey Schuster, le lipoti a le komisi suesue o le faigapalota o le tausaga 2021 ina ua mae’a ona tuufaatasia le taunuuga o sailiiliga a lea komisi suesue filifilia sa silasila i le tulaga na faagasolo ai le faiga filifiliga a le atunuu ia Aperila o le 2021, ma ni fautuaga ua latou tuuina atu i le Palemene e toe saga faaleleia ai ni faafitauli ma ni faaletonu sa tulai mai i lena palota tele, aemaise o ni fautuaga e toe faaleleia atili ai faiga filifiliga a le atunuu mo le sailia o sui usufono o itumalo palota i le Palemene o Samoa.
E pei ona silafia o nisi o vaega sa silasila iai le komisi o le palota mai fafo o tagatanuu o Samoa, le 10 pasene o nofoa faaopoopo o tamaitai i le Palemene pe a le atoa le aofaiga e ono o tamaitai, ma le toe vaevaeina o itumalo palota lea ua 51.
Ua faailoa e se molimau faatuatuaina o loo galulue nei le ofisa o le komisi o faigapalota mo le faaliliuina i le gagana Peretania o le lipoti a le komisi suesue, a o lei tuuina atu i le Kapeneta mo sana iloiloga, ma tuuina atu ai i le Fono Aoao Faitulafono.
E toasefulu sui na filifilia i le komisi suesue o faigapalota ma o se taimi muamua ua tofia iai nisi o tamalii ma failauga, faapea nisi o tamaitai o le atunuu e lei tauva i ni faigapalota e sailia ai tofi faipule o le Palemene.
O i latou ia e aofia ai le tofa Tuu’u Luafatasaga Dr Ieti Taulealo, Feesago George Fepuleai, Faamausili Dr Matagialofi Lua’iufi, Letuimanu’asina Dr Emma Kruse Vaai, faletua malolo manumalo o Erelini Vaiao Eteuati, Peseta Arasi Tiotio, susuga i le faifeau toeaina malolo manumalo Tavita Roma, Vaaelua Rimoni Vaaelua, Tupuola Oloialii Koki Tuala, ma le alii loia sinia le susuga Leuluaialii Tasi Malifa.
O le vaiaso na tea nei i le ofisa o le komisi o faigapalota i Mulinuu na tauaao atu ai e le taitaifono o le komisi suesue o faigapalota le latou lipoti i le Minisita o faigapalota.
