E lua gagana aloaia e faaaogā i Samoa o le tatou gagana ma le gagana Peretania poo le Igilisi. O le faaaogāina o le gagana Peretania e iai fanau e telegese ma tuai ona vave maua e le gata o le tautala ai, a o le tusitusi.
O le sao lea o faiaoga o alii ma tamaitai pisikoa Amerika o loo galulue i nisi o aoga tuma’oti ma aoga a le Malo.
Ma o lea foi na taunuu i le amataga o lenei vaiaso le isi vaega 93 lea o Pisikoa o le a galulue foi e aoao lea gagana ina ia mafai ona tautatala ma malamalama ai fanau, ae ia iloa foi ona tusi upu o le gagana Peretania.
O loo aofia i le vaega lea 93 o pisikoa se alo tamaitai o le nuu o Fagaitua i Amerika Samoa, ma o se faiaoga.
O le Minisita o Aoga Taaloga ma Aganuu le afioga Seuula Ioane ma ofisa sinia o le matagaluega sa latou faafeiloai le vaega fou o pisikoa mai Amerika i se ‘ava faatali, ma faeofoofota’i ai foi ma sui o le Malo Amerika i le ofisa o lea malo i Apia, e faafetaia ai le faaauau pea o lea polokalame o loo toomaga iai le matagaluega o aoga i le to’agaogao o faiaoga aemaise o le maua o lea fesoasoani e aoaoina atili ai le tautala ma le faitau aemaise o le malamalama i le gagana Peretania.
