Ua aumai i se tulaga faalauaitele se finagalo o le Matagaluega o Leoleo, Falepuipui ma le Toe Fuata’ina ua faailoa ai le tāua i lana auaunaga o le faailoa o faamatalaga uma o tagata e molia i solitulafono tau i fualaau faasāina, ma o se gaioiga o loo faia e tusa o ala o le tulafono o galuega faaleoleo o le tausaga e 2009.
Ua aumai faalauaitele e le Matagaluega lea faamatalaga i le tuanai ona faasalalau o ata ma faamatalaga uma o tagata e 54 sa pu’eina, taofia ma molia i le ma’ea o nisi o osofaiga sa sailia ai ma maua nakoti poo fualaau faasāina e aofia ai le ‘aisa ma le maruana.
O le tāua o le faailoa lautele o ia faamatalaga ua faailoa e le Matagaluega e tāua mo le puipuiga o aoga ma fanau, e faatāua ai le tulaga manino ma le mautali atu, faamalosia ai le galulue faatasi o tagata uma e taofia gaioiga solitulafono, atoa ai ma le taofia o isi tagata mai le faia o solitulafono e fesootai i fualaau faasāina.
E tasi se ata o se tamaititi 15 tausaga o loo molia i le ma’ea o ia osofaiga a leoleo na toe aveesea ina ua aliali faitioga i le fete’ena’i o le faailoa o le ata ma faamatalaga ma aiaiga o le tulafono o le faamasinoga o tupulaga talavou o loo tapu ai ona faailoa soo se faamatalaga o ni fanau iti e aafia ini solitulafono.
Ae i le faamatalaga faalauaitele mai le Matagaluega o Leoleo o loo faailoa ai lona faatāua o tulaga i fesootaiga ma soo se aiaiga faaletulafono e puipuia ai fanau iti ma le tulaga faaaloalogia o galuega tau faamasinoga ini mataupu ua i luma o foga a le Malo.
O loo faagasolo pea taumafaiga a leoleo le sailia o nofoaga o loo faapuna fanau ai le faatinoina o solitulafono e fesootai i le umia, faatau atu ma le faaaoga o fualaau faasāina i Samoa.
