O le mataupu e faatatau i le alii taalo o Joseph Suaalii ma le fesuiaiga i le va o taaloga, o se tasi lea o mafuaaga i le agai ese mai o lē sa avea ma Ofisa Sili o le Rugby Australia i le vaiaso nei, Andy Marino e pei ona lipotia e le Wide World of Sports ma le 9News i le asō.
O loo sailia nei e le Rugby Australia se isi o latou pule fou i le mae’a o le faalauiloaina o le faamavae o Andy Marinos mai le tofiga lea ae toe fā masina amata le Ipu o le lalolagi i Farani.
Ua faailoa foi i tusitusiga mai le Sydney Morning Herald i lea lava mataupu ua faailoa e nisi e lei malie Marino i le maliega na sainia e le Rugby Australia ma Su’aalii lea e lipotia e taitai ai le taitaifono Hamish McLennan ma le vaegatupe tele o loo aofia i lea maliega.
O loo faailoa foi i lea tusitusiga se finagalo faaalia o se tasi o alii taalo iloga a le Wallabies o Stephen Hoiles lea na ia faailoa i le Stan Sport o le mataupu lea ia Su’aalii o se inivesi atamai tele ma o le a faatumuina ai fale matamata uma a o lei agai mai le Liona a Peretania ma Aialani i le 2025, ma o se tupe faaalu lelei a Ausetalia.
O loo feta’ua’ina foi i lea lava lipoti o se tasi fetu pupula sa iai o le Wallabies i tausaga ua tuanai o Phil Waugh lea foi o loo i le fono faatonu a le Rugby Australia o ia le isi o loo maualuga le silasila iai a le toatele e ono sui tulaga ia Marino.
