E oo mai lava i le taeao nei o loo iai pea tagata malaga o loo poloka i le malaevaalele i Sini e mafua mai i faigamalaga sa faaleaogaina ma toe fetuunai mai le faaiuga o le vaiaso.
Pe ā ma le 150 faigamalaga na aafia talu mai le Aso Faraile i le malolosi o savili ma le faaitiitia o le aufaigaluega a le malaevaalele.
O le toatele o pasese o le autafafao ma nisi sa fuafua e agai mo tafaoga i le tuuaga o aoga a le fanau.
Sa faaleo le lē fiafia o le toatele o i latou ia ona o aafiaga i fuafuaga a aiga ma sauniga sa faatulaga ua lē taunuu ona o nei fesuiaiga.
Fai mai le ABC o pasese a le Virgin Australia e aupito tele o latou aafiaga.
O le faamatalaga mai le kamupani vaalele o loo galulue pea i le taimi nei e faamautu nisi o faigamalaga mo nai pasese na aafia i ia suiga.
