I le aso 29 o Aperila na maliu ai se tamaititi 14 masina le matua ina ua mae’a ona fai lona tuipuipui o le misela, rubella ma le mami, ae oo mai i le taimi nei ua silia ma le 2 masina, e lei maua mai lava se faamatalaga i le soifua maloloina poo le ā le taunuuga o suesuega sa faagasolo.
O le aso 3 o Me na faasilasila aloaia ai e le matagaluega o le soifua maloloina le faia o le suesuega i le mafuaaga tonu o le maliu o le tamaititi.
Sa maua se avanoa e fesiligia ai e faatonu sili aoao o le soifua maloloina i se faamatalaga lata mai o le suesuega.
O lana faaaliga mai o loo faatali i leoleo le suesuega o le taotoga faapitoa auā o leoleo e aumaia le foma’i mai Fiti mo lea taotoga
E lei manuia sailiga i le komesina o leoleo poo se leoleo sinia e mafai ona maua ai se faamatalaga o lea tulaga.
O fanauiti uma sa fai tuipuipui ma le tamaititi ua maliu e aofia ai ma lona uso masaga, e leai ni tulaga faaletonu na aliali mai ai.
