O le faaiuga o le vaiaso na tatalaina aloaia ai le Fale Komiti o le afioaga o Satoalepai.
O lenei maota o le a feagai lea mo atina’e aemaise o galuega faatino a tina ma tamaitai o le afioaga.
O le Pule Sili a le Matagaluega o Tina Tamaitai Nuu ma Aga Fesootai Dr. Mema Motusaga na ia ta’ua ai le naunautaiga a le Malo e pei ona faataoto i ana faiga faavae.
“E pei ona iai le manulauti a le Matagaluega ia lelei pulega a nuu faapea le faaaogāina o tina ma tamaitai ia latou pitolaau ma lo latou sao ina ia manuia.”
“O so matou manatu i lenei aso o pine ia o a outou tatalo lēleoa, o pine ia o a outou galuega faatino ma lo outou ola faatuatua ua manuia ai lenei atina’e.”
E pei ona faailoa e le Matagaluega, o le faama’ite a le Malo e unai le atina’e o tina ma tamaitai ma ana nafa tausi sa tuuina ai i le tala faatatau o tupe 2022/2023 le faatupeina o le faaleleia o Falekomiti o le maota e faatino ai faiva alofiaao o tina ma tamaitai.
