O le faamamafa a le Malo i lana manulauti ia manuia ma puipuia Samoa ma ia gafataulimaina ana lava atinae e tuuitiitia ai le faalagolago tele i oloa gaosi mai fafo.

O se tasi lenei o kamupani ua tele sona sao i le tamaoaiga o le atunuu lea ua tatala aloaia ai le nofoaga e fasi ai moa ua ta’ua o le Sunshine Pacific Limiteds Afolau Chickens (S.P.L.A.C.) auā fefaatauaiga aemaise o le fofoga taumafa a le atunuu.

Na saunoa le Palemia, Afioga Fiame Naomi Mata’afa o le a tele se sao o lenei fale i o tatou tagata.

“O le lavatia ma le maua pea o taumafa o se tulaga maualuga i taumafaiga a le tatou Malo ae le gata i lea o le maua ai lea o avanoa faigaluega auā le tapueina o le tomai ma agavaa mo le atinaeina o Samoa.

“O le oo mai ai o le Koviti-19 i Samoa e le gata sa matua oia ai lo tatou tamaoaiga ae na manino ai le tāua tele ai le faamoemoe o i tatou ia i tatou lava ia tatou tapenaga.

“E iai le talitonuga o le a avea Samoa e faatauina atu moa lelei mo fefaatauaiga ae le gata i lea o le a aogā i o tatou lava tagata i aso uma.”

Na faailoa e le Palemia e iai le talitonuga o le a lē muta ai le faatinoina o atinae tetele faapenei mo le manuia o Samoa.