O le filifilia o faamasino e toatolu o le Faamasinoga o Fanua ma Suafa i aiaiga o le Tulafono fou o Faamasinoga o Fanua ma Suafa o le tausaga e 2020, e solitulafono ma o le mafuaaga lea ua faia ai le faaiuga a le komisi o galuega a lea faamasinoga, e faamuta le toe avea ma faamasino o lea faamasinoga tāua a Samoa, o le afioga Tuioti Sakaria Taituave, le afioga Tuilagi Saipele Esera, ma le afioga Iuli Auga Sefo.
Ua lipotia le faia o lea faaiuga ae o loo iai pea le avanoa mo faamasino ua faamuta o latou taimi galulue, e toe talosaga ai i aiaiga o lea Tulafono ua mae’a ona faia iai ni teuteuga lea sa pasia e le Palemene i lana tauaofiaga i le masina amata o le tausaga nei.
Ua lua tausaga o galulue faamasino ua faamalolo, lea sa faatauto i le masina o Aperila o le tausaga e 2021.
