O le Aso Lua o lenei vaiaso ua amata faaaoga ai le maota fou ua mae’a fausia i se vaega o le lotoa o loo iai le maota gasegase o Tupua Tamasese Meaole i Motootua, ua siitia iai le falemai faamamā toto.

O se galuega ua le gata ina fou le fale ae ua fou foi masini o le a mafai ona faatino ai togafitiga o le faamamā lea o toto o gasegase e onosefulu i le taimi e tasi.

O le tausaga e 2017 e pei ona faailoa e le minisita o le soifua maloloina na ioeina ai e le kapeneta le faia o lea galuega, ae ua faatoa mae’a lelei ma tatala ia Tesema o lenei tausaga 2022, ina ua uma ona faapipii masini faamamā toto na faatau mai i se kamupani i le atunuu o Siamani.

O le isi lea mafuaaga o le toso umi o le galuega ma tuai ona faaaoga le nofoaga fou, ona sa tapunia tuaoi o atunuu ma lē mafai ai ona malaga mai i Samoa inisinia a le kamupani i Siamani e faapipii masini.

Le afioga Valasi Luapitofanua Toogamaga Tafito Selesele, le minisita o le soifua maloloina i se vaega o lana saunoaga na tatala ai le nofoaga fou o le falemai faamamā toto.

O lea auaunaga a le matagaluega o le soifua maloloina na amata faagaioi i le tausaga e 2005, ma e toaono gasegase na amata ai, ae o le taimi nei ua silia i le toaselau tagata ua aafia fatugao ua sulufai i lea auaunaga ma e le gata i le auaunaga i le maota gasegase i Motootua ae faapena foi i le falemai faamamā toto o loo i le maota gasegase i Tuasivi i Savaii lea na amata faagaioi i le tausaga e 2011.

O le tau o le falemai faamamā toto fou i Motootua e tasi le miliona 750 afe tala.

O mafutaga a tina o le ekalesia faapotopotoga kerisiano Samoa ma le au uso fealofani a le ekalesia metotisi o nisi ia o faalapotopotoga o loo tuuina atu pea i tausaga tasi a latou foai tupe mo le faagaioia o falemai faamamā toto i Upolu ma Savaii.

O ni fesoasoani o loo lagolago i le Malo i le faatupeina o lea auauaga taua mo le soifua manuia o tagata o le atunuu.