Ua sau i tua fuafuaga a le puleganuu a Aukilani le Auckland Council mo le faaalia o finagalo o tagata lautele i le mataupu o loo talanoa ai le suia mai le vaiaso e agai i le tailua vaiaso ma ao le lapisi.
O lea e ao i vaiaso uma le lapisi a Aukilani, peitai o le fuafuaga ua tatala nei mo faatalanoaga e ono suia ai i le tailua vaiaso ma ao ma afai ae faataunuuina, e amata aloaia mai ia Iulai 2026.
O se fuafuaga ua fai mai ai ma le sui o le pulega a le Council o loo gafa ma lapisi, Parul Sood, afai ae faigata i aiga toatele le suiga o le a ao ai tailua vaiaso, o loo mafai ona faatalosaga mo le isi bin lapisi, poo le faatalosaga foi o le bin lapoa atu e 240L.
O le suiga o le aoina o le lapisi a Aukilani o se tasi o fuafuaga o loo ogatasi ma le taumafai ia tuuitiitia le tele o le lapisi lafoai, e pei ona vaavaai ai ia faaitiitia i le tusa ma le 32,000 tone i le tausaga.
O le suiga i le tailua vaiaso ma ao le lapisi o lea ua faia e le lata i le 20 Councils i totonu o Niu Sila e aofia ai ma Kalaiesetete lea ua silia ma le 15 tausaga o fai.
