Ua tatala se tasi o poloketi, o kalone lapisi a le afioaga o Vaiala, i le Afio o le matua o Tofaeono ma Tama, Asi ma Pātū; Maliu mai laua na ta’i…Tamapua ma Manogiamanu ma le nofoāituaiga ia Fuata.
Ua lua tausaga o faatali le afioaga i le Poloketi e pei ona talosaga ai i le Small Grant Project a le UNDP i le tausaga e 2022 lea faato’ā tali mai.
E tusa ma le $29,000 le tau aofai o lapisi e silia i le 50 kalone.
Ua faailoa foi e le fofoga o le aso ia Fofogamua Sailo Tulifau ua mae’a faatulaga foi isi lapisi i le talafatai o le afioaga ua mafai ai ona faavasega ituaiga otaota.
O le faamoemoe ia mamā ma matagofie le siosiomaga e lē gata i tagata tafafao mai ae ia mo lo tatou lava lelei ma le soifua mālōlōina.
Na ta’ua e ui i le taimi umi ae o le agaga faafetai o le afioaga ua tino mai le poloketi e tusa o la latou talosaga.
O Vaiala le isi nuu i le talafatai o Apia e fai ma mālōlōga i aoauli ma afiafi a le toatele o le mamalu o le atunuu i luga o taligalu, ma o se tulaga o loo tuuina mai ai pea le tuualalo ia tautuanā le tulaga mamā o loo taumafai iai le afioaga ia tausia pea e o tatou tagata o le a faaaogāina.
