I le atoa ai i le tausaga lenei o le 50 tausaga talu ona faatū ma faavae le asosi poo le faalapotopotoga o tusitala ma le ‘aufaasalalau a Samoa le JAWS, o lea ua pine faamau nei le tele o ia tausaga o le faalapotopotoga i le tatalaina o lona ulua’i ofisa tutotonu mautū mo ana galuega fai ina ua agalelei iai le polokalame fesoasoani mo galuega faatusitala ma faasalalau a le malo o Ausetalia mo atunuu o le Pasefika e ta’u faapuupuu o le PACMAS.
O le Komesina Maualuga o Ausetalia i Samoa, Will Robinson na saunoa e tatala le ofisa autū o le JAWS ma ia faailoa ai e tāua tele le iai o se nofoaga lelei e faatino ai galuega mo lea tomai ma tautua i lo tatou atunuu auā e tāua lea galuega i le sa’ili’ili ma māta’itū galuega a le malo.
O le Minisita o Tupe o se tasi o Sui Palemia le afioga Mulipola Anarosa Ale Molioo sa ia ooti le lipine e aloa’ia ai le tatalaina o le ofisa, ae sa ia saunoa ai foi i le tāua o le pitolaau a tusitala ma le ‘aufaasalalau.
O se tasi o potu o le maota o le ABM building i Saleufi i le fogāfale i luga sa iai le ofisa autū o le pulega o le suavai i tausaga ua mavae, ua faagaioia ai le ofisa tutotonu o le JAWS.
