I le lua tausaga sa fuafua e mae’a ai le galuega o le fausia o le fale mataaga fou i Malifa i se fesoasoani mai le atunuu o Saina, na tuai ona mae’a lea galuega mo le isi lua tausaga ona o le pipisi o le faamai Koviti-19.
Na tuai taunuu ai oloa faufale mo le galuega faapea ma tagata popoto i le fausia o maota faapea ona sa tapunia tuaoi o atunuu e aofia ai ma Saina na amata mai ai le pipisi o le faamai i le tausaga e 2020.
O le Aso Lua o le vaiaso nei na faatoa umusa ma tatala ai lea galuega tele e faitau miliona lona tau ma sa faatupe i se foai mai le Malo o Saina e tauala mai i le pulegamalo faaitumalo e ta’ua o Huizhou Municipal People’s government o Guangdong Province i Saina.
O le pulegamalo faaitumalo foi lea na sainia le maliega ma le Malo o Samoa latou te faatupe le fausia o le nofoaga o le Friendship Park i le eleele fou lea ua mae’a ona tatala ma ua faaaoga.
Se vaega o le saunoaga a le taitai o le Malo le afioga i le Tamaitai Palemia, Afioga Fiame Naomi Mataafa, na tatala aloaia ai le maota fou ua avea ma nofoaga e tapuvae tasi iai le teuina ma le faalauiloaina o a tatou tu ma aganuu faapea measina a Samoa.
O le nofoaga e pei ona faaigoa o le malae o aganuu ma measina a Samoa i Malifa ua iai i totonu se nofoaga faapitoa i sauniga tetele e pei o koneseti ma faafiafiaga e mafai ona nofoia e le 400 o tagata.
Ua iai ma masini o fesootaiga faaleotele leo faaonapo nei ma moli felanulanuai, e pei ona vaaia i nofoaga faapea i atunuu i fafo.
