Ua talia le talosaga a Sera Skelton lea na taofia i se faaiuga a le faamasinoga i le vaiaso na tea nei, e faatali ai le lauina o sona faasalaga i le moliaga e tasi ua ia ioeina o le lima tagoese i se tinoitupe e 20 afe tala o tupe o trust funds sa teu i le ofisa o faamasinoga.
O le Aso Lulu na suesueina ai lana talosaga e ala i lana loia ina ia tatala i tua i ni aiaiga, ma o le mae’a ona iloiloina o le folasaga a lana loia na faia ai le faaiuga e tatala i tua.
O le aso 15 o le masina nei e toe valaau ai le mataupu mo ni finauga faaiu a loia ma se lipoti mai le ofisa faanofo vaavaaia e fua iai se faasalaga.
O lē ua molia sa avea ma pule o le vaega o auaunaga lautele le corporate service a le matagaluega o faamasinoga ma le faafoeina o mataupu tau faamasinoga.
I le suesuega o le maliu lilo o Kolani Jr Lam, ua toe tolopo i se aso e faaauau ai le fofogaina o molimau a le pule ma leoleo o le falepuipui i Tanumalala, ina ua mae’a ona suesueina molimau a pagota e toalima.
Faaalia e le leoleo o loo feagai ma le suesueina o molimau ua iai nisi tuatuagia tāua o le pule o maliu i nisi o mataupu tau faamasinoga ua mafua ai ona toe tolopo ma e lē o iloa se aso e toe faaauau ai.
