Ua faigofie nei mo le mamalu o le atunuu i le motu o Savaii ona faatino a latou lesitala mo le faigapalota o sosoo ai a le atunuu e sa’ili ai tofi o itumalo i le Palemene, ona ua tatala nei i le taulaga i Salelologa se ofisa o le Komisi o Faigapalota.
O le Aso Lulu o lenei vaiaso na amata ai le auaunaga a lea ofisa o le malo i le fogafale 2 o le maketi i Salelologa, ina ua mae’a se sauniga na tatala ai le ofisa ma sa auai le Komesina o faigapalota le afioga Tuiafelolo Alexander John Stanley.
O le tausaga fou le isi palota tele a le atunuu ma ua fetaui le tatala o le ofisa o le komisi o faigapalota i lo tatou motu o Savaii ma galuega o loo faagasolo i le toe lesitalaina o tagata palota mo itumalo faapalota e 51.
O nisi o teuteuga o le tulafono o faigapalota o loo fuafua mo lea faiga filifiliga a le atunuu o loo taoto nei i le Palemene mo le talanoaina.
O le ofisa i Salelologa e pei ona faailoa i auala o fesoota’iga a le ofisa o le komisi o faigapalota e tatala i le 9 i le taeao ae tapunia i le 5 i le afiafi.
