O le afioga i le Sui Palemia, Afioga Tuala Tevaga Iosefo Ponifasio sa avea ma sui o le tatou Malo na te tatala le mafutaga tele faakoneferenisi a tupulaga talavou o le Ekalesia Asofitu o le Toe Afio Mai le Misiona, e lē gata i Samoa a o tupulaga o nisi o atunuu o le Pasefika o sui o lea ekalesia.

Ua faailoa i upega tafa’ilagi o loo faasalalauina faamatalaga o lea mafutaga, o se faamoemoe ua faatasia ai tupulaga o le ekalesia mai atunuu e pei o Tonga, Fiti, Niue, Kilipati, Solomona, Vanuatu, Tuvalu, Samoa ma Amerika Samoa.

O le faamoemoe autū o le mafutaga ia faatasia tama ma teine talavou o le ekalesia e saga faaa’upegaina i le upu o le ola ma tapu’e o latou olaga faakerisiano.

Ua faaalia o se tasi o vaega tāua o lea faatasiga o le papatisoga faatofu i le vai na papatiso ai le 65 o tupulaga o le ekalesia na auai i le mafutaga.

E silia i le tasi le afe limaselau tupulaga sa mafuta faatasi ai i lea faatasiga sa faagasolo i le faleta’alo o le Iunivesite aoao a Samoa.