Ua tatala e le Tamaitai Faamasino ia Alalatoa Rosella Papalii le tina ia Maylynn Brown ina ia foi atu i lo la aiga e tausi lana fanau.
O le tina ia Maylynn ma lona toalua o Vaa sa toe taofia e leoleo ina ua o la solia tuutuuga o le tatala ai o i laua i tua.
O loo molia i laua i moliaga e silia i le 200 o le taufaaleaga faasaga i le Matagaluega o Leoleo.
O le tatala ai i tua o Brown ua matuā faamamafa mai ai ma tuutuuga a le faamasinoga, ina ia faamuta loa le itulau a lea tina i le Facebook, ae tatala pea le Messenger ma le WhatsApp auā fesootaiga.
O isi tuutuuga ua tuuina atu e le Faamasinoga e aofia ai le saini i Faleata i Aso Lulu uma ma ia nofo i Aleisa.
Ua lapataia foi ia ina ia aua lava ne’i toe agai i luga o le social media ma faia ni faamatalaga i leoleo ma le Komesina o leoleo.
Ua poloaiina foi Sooau Vaa ina ia toe tulai i le Aso Lua o le vaiaso fou e toe iloilo lana talosaga e tatala ai i tua.
