Ua tomua nei le Koneferenisi a le Ekalesia Metotisi o lenei tausaga i taaloga a tupulaga talavou a le Ekalesia Metotisi lea na amatalia i le aso i le laumua.
O le taitai o le sauniga Susuga i le Sea, Taumafai Komiti na lauga i le manulauti o lenei faamoemoe.
“E manino le autu o lenei aso fai ma toa e faasoa le talalelei, toa i lau savali, tu ma tautala, toa i le amio pulea.
“Avea lenei faamoemoe e amatalia ai le Koneferenisi e ala lo outou sao tāua.”
Na tatala aloaia ai i le saunoaga a le Peresitene a le Ekalesia, Faulalo Leti mo lenei faamoemoe.
“O le feau o lenei vaiaso atoa ia fai outou ma toa o le talalelei.
“A ua ou manatu lava i lenei taeao ina ua potopoto fanau a le Ekalesia, ua oo i le taimi tatou te alalaga faatasi ai i lenei taeao aemaise le vaiaso ua amata ai taaloga ia avea Keriso ma faatumutumuga o lou olaga.
“E te taalo loa mo le isi tagata ona e iloa loa lea ua tupu le faaletonu auā ua e alu ese mai le faavae o tupulaga a le Ekalesia ae a e taalo mo le Alii e te taalo fiafia.
“O le manulauti mo oe le tupulaga mo a taeao tulai mai o outou o le lumanai.”
O nisi o taaloga e aofia ai le lakapi taitoafitu, lakapi pa’i, volipolo faapea ai ma le kirikiti.
O lenei faamoemoe o loo auai uma ai tupulaga talavou a le Ekalesia Metotisi i Samoa nei faape ai ma atunuu e mamao.
