O le uluai fonotaga lenei a le Asosi o tausi soifua i fale tipitipi i le Pasefika poo le Pacific Islands Operating Room Nurses Association(P.I.O.R.N.A.) lea o loo usuia i Samoa nei.
O le tatala aloaia ai o lenei fonotaga na saunoa manino ai le Minisita o le Soifua Maloloina Valasi Luapitoifanua Tafito Selesele, i le tāua o lenei fonotaga mo tausi soifua o loo galulue i lenei vaega.
“O le tasi lenei o manulauti ma itutino aupito sili ona faatāua e le Malo, o le tulaga i le soifua maloloina.
“O le siitia foi o le tomai ma le agavaa faatausi soifua e aogā tonu iai fonotaga faapenei i auala e ao ona siitia ai pea le tulaga o auaunaga faatausi soifua i fale tipitipi.
“O le tuuina atu o gasegase mai Samoa nei mo togafitiga i atunuu e mamao e taugata lona faatupeina ma e iai lo’u talitonuga o vaega uma o le a talanoaina i lenei fonotaga o le a ogatasi lea ma alafua ua mae’a faataatitia mo le soifua maloloina i ana auaunaga.
“Ia avea lenei fonotaga o se auala mo le Malo o Samoa e tauala atu i le Matagaluega o le Soifua Maloloina e faamalosia ai ana faigapaaga ma le Asosi o tausi soifua i fale tipitipi i le Pasefika mo le atinaeina o le tomai ma agavaa o tausi soifua auā le faalauteleina o le malamalama i lenei auaunaga.”
O loo ave le lagolago a le Malo e tauala atu i le Matagaluega o le Soifua Maloloina, o le Soifua Maloloina a le lalolagi aemaise nisi o faalapotopotoga auā le faataunuuina o lenei fonotaga mo le vaiaso nei.
