O le lona 6 ai lenei o faaaliga o laei o faiva ma taleni o loo limalima ai nisi o pisinisi ofu e lē gata i Samoa ae o le Pasefika lea na tatala aloaia i le afiafi ananafi.
O lenei faaaliga o loo mafai ona tuuina ai le lagolago a nisi o kamupani i le atunuu ina ia mafai ona faalauiloa taleni e ala i le tuufaatasia ai o laei i ona teuga eseese.
Na saunoa le Sui Palemia, Tuala Tevaga Iosefo Ponifasio o ia foi o le sui a le Samoa Art Council i lenei faaaliga, o se auala e faailoa ai taleni i laei auā le atina’e ai o tamaoaiga i pisinisi.
“Ua tatou vaai ma molimauina le siitia o le tulaga o lenei faaaliga i Samoa ae le gata i lea o ata o loo faalauiloa ai na tusia ma fatuina i mafaufauga o tatou tagata.
“E faafetai ai Kevin Lucky ma le EMD mo lenei sao tāua i o tatou tagata faipisinisi i le itu tau laei e maketi ai ma o se tasi o avanoa e faalauiloa ai taleni.
“A o faagasolo ai lenei faamoemoe i aso ua faatulagaina ia ave la tatou lagolago e ala i le auai e molimauina taleni ma agavaa ua tuufaatasia.”
O lenei faaaliga o loo lagolagoina e le tele o kamupani ma pisinisi i le atunuu ma o le Aso Faraile e faamae’a ai.
