I le savalia ai nei o le 11 masina o nofo taofia ai pea i le vaaiga a leoleo i le falepuipui i Tanumalala le tamaitai tusisolo ma talafatu o Papalii Sia Figel, e faatali le aso e su’esu’e ai ona moliaga, o le Aso Gafua o le vaiaso nei na toe valaau ai le mataupu lenei mo le loia a lē ua molia e tuuina atu lipoti mai Amerika o su’esu’ega a foma’i i le mafaufau ma le soifua mālōlōina o Papalii.
Peitai sa faailoa e le loia o Unasa Iuni Sapolu e le’i taunuu lava lipoti o loo ia mana’omia.
O loo naunau loia a le itu a leoleo e fia silasila i lea lipoti e tapena ai se latou tali e tuuina atu i le faamasinoga.
Peitai o le le’i maua lava o lea vaega tāua mo tapenaga a le loia a lē ua molia, ua tuu ai nei le avanoa e tasi e faaoo atu ai i le faamasinoga lea lipoti i le aso 22 o le masina nei o Aperila.
Ua faamauina e le faamasinoga tali tetee a Papalii Sia Figel i moliaga e ono a leoleo, lea e aofia ai moliaga o le faaoo o le maliu i le tamaitai polofesa o Dr Caroline Sinavaiana Garbbard o se tagatānuu o Amerika Samoa.
O le a faamautū i le valaauga i le aso 22 o le masina nei le laasaga e sosoo ai o taualumaga o lenei mataupu tau faamasinoga ua umi o valaau ma tolopō pea ma faaauau ai ona nofo taofia i le vaaiga a leoleo lē o loo molia.
