Ua tapunia nisi o auala ma aveesea faamalosi mai nisi o aiga I le taeao nei mai Wairoa, ao lolovaia ai East Coast.
O Wairoa o lea o loo I lalo o lapataiga lanu moli o timuga mamafa, ma o lea e le gata ua tapunia state highways lalata ane, ae faapea nisi o auala tua.
E oo mai I le taimi o tala o le taeao o lea ua faailoa uma foi e le Waka Kotahi auala taitasi ua tapunia le tumau ona o lologa.
Ae mai le pulenuu a Wairoa I le taeao nei, Craig Little, e lua aiga ua aveesea faamalosi mai o latou fale ona ua le saogalemu.
E ui la o loo ripotia e le ofisa o le vaaitau e amata mama mai timuga I le taeao nei, o le tatafe o vaitafe e ono faaauau pea mo sina taimi ona o le maualuga o le suavai mai timuga mamafa anapo.
O lea foi ua fai mai le council a Wairoa ua tatala le evacuation centre poo le nofoaga e sulufai agai iai tagata ua iai I se tulaga lamatia o latou fale.
O Wairoa ma le tele o vaega o le East Coast, o lea foi na matuai iloga ona tigaina I le afa o Gabrielle I le amataga o le tausaga.
