E tele a’oga i le aai o Palmerston North na tapunia faafuase’i i le Aso Tofi o lenei vaiaso, ina ua faamaonia le maua o ni minerale oona ua faaigoaina o le asbestos i le pāpia o le Fitzherbert Bar ina ua faatama’ia i le afi.
I lipoti mai le leitio faavaomalo a Niu Sila le RNZ, na lipotia mai ai poo le toe 15 minute i le itula e 5 i le afiafi o le Aso Tofi, na amata vaaia ai le sasao ane o le afi, ma ona o le malosi o le mū na molimauina ai le ausa uliuli, ua faateteleina ma ua pogisa atoa ai lea aai.
Na faaalia e le Ofisa o le Tineimū ma Faalavelave Faafuase’i, e le’i toe faatali le latou auaunaga mai le tuuina atu o fautuaga ina ia tapunia loa a’oga lata ane, o Monrad Intermediate, Palmerston North Intermediate Normal School, ma le College Street Normal School ona o aafiaga o lenei faafitauli poo le asbestos i le ea e mānavaina e tagata.
Ta’ua e se tasi o molimau, na vaaia le vave o le sasao o le afi ona o le malolosi o savili.
Maitauina le oo atu i le 10 vaega o tineimū poo fire crews na taumafai e tali atu i le faalavelave.
Ua māua na faato’ā mafai lava ona taofia le sasao tele atu o lea malaia poo le itula e 8 i le afiafi.
Tele masini mamafa na faaaogā e tuu ai i lalo nisi o vaega o le fale ma itu o loo tele ai le asbestos.
Ua fautuaina tagatānuu o lea aai, e nonofo i totonu o fale, ma tāpunipuni uma faamalama ma faitoto’a mai le ono sao atu o le asu, a o le ea oona mai le asbestos.
Ia mautinoa e lē ono aafia se soifua mālōlõina o se tasi.
O le asbestos e mata’utia ona aafiaga pe afai ae mānavaina e se tasi, e pei ona tele ina aafia ai le māmā ma aafiaga o le kanesa.
Puna o Faamatalaga: https://www.rnz.co.nz/news/national/577358/fire-at-asbestos-filled-palmerston-north-bar-suspicious
