O le faaiuga o le vaiaso nei lea o le a faia ai se faaaliga a le polokalame lenei ua ta’ua o le Anofale o loo taimua ai se tasi o faalapotopotoga ua ta’ua o le Onomea Production.
Ua lima vaiaso o faagasolo pea lenei polokalame e patino lea i tamaitai ma lo latou sao i totonu i soo se atina’e i le atunuu.
Na faailoa e se tasi o sui o le polokalame, Aterina Samasoni Pele na faaalia e le kamupani telefoni a le Digicel lea o loo lagolagoina lenei taumafaiga.
“O lenei polokalame o se sao faatauvaa a le Onomea Productions e lagolago ai le soifua fai a’e o tamaitai i le latou savaliga ia avea i latou ma taitai i totonu o aiga, nuu aemaise le atunuu i le lumanai.
“E faaaogāina ai agavaa ma tomai o tamaitai Samoa sa taimua aemaise o la latou tautua i soo se tofiga i le atunuu ua tofia ma valaauina ai i latou.
“E le gata i lea e faaaogāina ai le matagofie o tu ma aga faa-Samoa na mataaalia ma tino mai i faamoemoe e sailia ai tausala o Samoa i tausaga ua mavae.”
E pei ona ta’ua e Pele o le autu o loo tulimata’i i lenei faamoemoe ia lava tapena tamaitai ua auai i tomai ma agavaa auā so latou valaauina e tautua ai i le atunuu i le lumanai.
O le a faatautaia lenei faaaliga i le fale Mataaga i Malifa o le a maua ai le avanoa e maimoa i taumafaiga a alo tamaitai o loo auai ai.
