Ua toe tapena loia sa tauaveina le itu a le Fofoga Fetalai o le Palemene e faaulu se talosaga e toe iloilo pe apili ai le faaiuga o le faamasinoga lea na fofogaina i le Aso Lua o le vaiaso nei, ua faamuta ai le faasalaga 2 tausaga na faamalolo lē tumau ai sui faipule le susuga Tuilaepa L Sailele Malielegaoi ma le tofa Lealailepule Rimoni Aiafi.
Sa molia e ia sui faipule le Fofoga Fetalai ma le fono aoao faitulafono na lagolagoina le fautuaga o le faasalaga na faia e le Komiti o tulaga mamalu ma amio taualoa a le Palemene.
O le pepa o faasalalauga faalauaitele mai le ofisa o le Fofoga Fetalai ua faailoa ai o le toe faia o se iloiloga i nisi o vaega o le faaiuga o le a faamanino tonu ai le faapea mai o le faaiuga, e iai le malosiaga o le Palemene e faamalolo lē tumau ai sui faipule ua faamaonia le moliaga o le faalemigao poo le contempt, ma o le malosiaga foi lea e mafai ona taofi ai totogi ma isi faamanuiaga o faipule ua faamaonia lea solitulafono.
Peitai o le faaiuga ua aumai o loo faasino i le umi o le taimi o le faasalaga ma ua lē maua ai se leo o tagata o itumalo o faipule na faia iai le togisala.
O le tasi o itu ua fesiligia o le faaiuga, o le talia e le faamasinoga o se tasi o vaega o teuteuga o tulafono tumau i aiā saoloto e faaali ai manatu, ae ua lē silasila i le atoaga o le mafuaaga na faia ai teuteuga o tulafono tumau.
O le faaiuga ua aumai i le vaega lea ua faaleaoga ai teuteuga na pasia e le Palemene ona ua aafia ai aiātatau o sui faipule e faamalolo lē tumau i lalo o le Vaega 13 o le Tulafono Faavae.
O le toe oo o le mataupu lenei i le Faamasinoga o Talosaga toe iloilo poo le faamasinoga apili a le Faamasinoga maualuga, e le o faailoaina ai poo afea o le a faaulu atu ai le talosaga apili.
Toe tasi le tauaofiaga a lea faamasinoga mo lenei tausaga lea e masani ona tauaofia i se taimi o le masina o Oketopa.
