O le amataina o le polokalame lenei o le auina mai o tagata Samoa i atunuu i fafo i galuega faavaitaimi e tele ni faafitauli sa tulai mai ai, ona e lei lelei le tapenaga sa iai i lona amataga, e ala i tagata e tatau ona malaga mai, o feagaiga faalemalo, o feagaiga a kamupani o loo aumaia o tatou tagata ma tagata faigaluega.
Ma o le ala foi lea o le taofiofi o le faigamalo o loo tulai mai i le taimi lenei, ona se’i toe faataoto lelei faiga faavae ma taiala e puipui ai nai o tatou tagata ina ia aua ne’i oo mai i atunuu ne’i soona fai faapologa o tatou tagata e i latou e ona kamupani.
O fuafuaga ma tapenaga lea ua fai nei i Samoa e le malo, ua tapena tagata faigaluega i le mafaufau, tapena i le malosi, tapena i le malamalama i le gagana peretania ina ia faigofie ona maua fesootaiga lelei, ia agai mai iinei i Niu Sila ma Ausetalia ua silafia le tulaga i le suiga o le olaga, suiga o le siosiomaga, faapea le suiga o le tau.
O le tāua lea ua tapena nei iai le malo ina ia lelei le sauniga o tatou tagata mo nei galuega.
Ua tapena toto’a le malo mo feagaiga faavaomalo, ina ia mautinoa o loo vaavaai lelei e kamupani nai o tatou tagata pe a malaga mai i galuega e ala ia latou konekarate, o tupe e tatau ona maua, o le vaaiga o le soifua maloloina, o nofoaga o loo nonofo ai, aemaise ia maioio lelei mea e tatau ona fai.
E iai le talitonuga o le malo a faataoto lelei faiga faavae ma taiala e ono lima taitaiina ai galuega o le a lē taumate le manuia o a tatou tamafanau o loo agai mai mo galuega.
