E ui o le masina sefulutasi lenei o le tausaga ua amata ai le tau o afā se’ia oo atu ia Aperila o le tausaga fou e pei ona faailoa lautele ai e le vaega o loo galulue i le auaunaga o le vaaitau, peita’i e iai nisi o polokalame ua faailoa i le kalena o mea e tutupu i lenei masina e sosoo ma le masina faai’u o le tausaga.
O le tauvaga siva ailao afi o loo tapena i tausaga uma e le kalapu o le Siva Afi ma o le tausaga lenei ua atoa ai le 23 tausaga o faia lea tauvaga.
O le aso 20 o Novema lea tauvaga e tauva ai alii ma tama’ita’i ma sa’ili ai le siamupini o le 2025.
O le masina foi lenei o le asiga mulimuli o le palolo e pa’ū tonu i le aso 12 ma le 13 o Novema.
Ae o se tasi o vaega tāua mo le masina lava lenei o Novema o tau o suāuu ma penisini i Samoa e pei ona faailoa mai ai e le matāgaluega o tupe a le malo le siitia uma o tau o ia oloa.
O le penisini ua 2 tālā 97 sene i le lita ae sa 2 tālā 96 sene ia Oketopa.
O le suāuu kiso sa 3 tālā 8 sene i le lita ua sii nei i le 3 11 sene i le lita, i le ma le kalasini sa 2 tālā 67 sene i le lita ua sii i le 2 tālā 69 sene i le lita.
