Ua sauni le ta’ita’i o le malo le afioga i le Palemia e tula’i i le Faamasinoga Maualuga e tali i le tagi o le faia o se tuua’iga taufaaleaga e ala i se su poo se lawsuit e silia i le miliona tālā.
O lea matāupu tau faamasinoga ua faaulu e le afioga i le Sa’o Faapito le afioga Fiame Naomi Mataafa sa avea ma Palemia lea ua tuua’ia ai le ta’ita’i o le vaega faaupufai o le Faatuatua i le Atua Samoa ua Tasi le susuga Laaulialemalietoa Leuatea Polataivao Fosi Schmidt, ua avea nei ma Palemia ma ta’ita’i o le malo.
I le faatalanoaga a le Palemia ma le polokalame o le Lupe Faalele a se leitio faasalalau i Amerika i le Aso Toona’i na te’a nei, sa fesiligia ai sona finagalo e tusa o le tagi a lē sa avea ma Palemia o le ulua’i ta’ita’i o le vaega faaupufai o le Faatuatua i le Atua Samoa ua Tasi le afioga Fiame Naomi Mataafa.
Ua mae’a tuuina atu le tagi a le afioga Fiame Naomi Mataafa i le faamasinoga ma e le’i faamautūina se aso e fofogaina ai mo le valaauga muamua.
O le matāupu tau faamasinoga poo le tagi a lē sa avea ma Palemia o le atunuu e māfua mai i se saunoaga a le susuga Laaulialemalietoa Leuatea Polataivao Fosi Schmidt i se tasi o faalauiloa o anavatau a le Faatuatua i le Atua Samoa ua Tasi poo le Roadshow i Savaii, a o lumana’i le faigāpalota tele sa ia faailoa ai se tuua’iga i le aafia o le afioga Fiame Naomi Mataafa i le solitulafono na fasiotia ai le tama’ita’i polofesa o Caroline Sinavaiana Gabbard.
